Во најновото издание на емисијата Мој збор, гостуваше Ана Марија Алексова Малева, претседателка на Националната асоцијација на туристички агенции, каде се отворија актуелни теми поврзани со туристичките патувања и безбедносните предизвици на глобално ниво.
Во разговорот беше ставен фокус на влијанието на случувањата на Блискиот Исток врз одлуките на патниците, особено во контекст на зголемената несигурност и страв. Се анализираше што значи кога туристите превентивно ги откажуваат своите патувања, какви се последиците за туристичките агенции, но и какви се обврските и можностите за рефундација или пренасочување на аранжманите.
Дополнително, Алексова Малева зборуваше за навиките на македонските туристи – каде најчесто летуваат, кои дестинации се најбарани и како се менуваат трендовите во услови на глобални кризи.
Емисијата се осврна и на потенцијалите на домашниот туризам, при што беше нагласено дека Македонија располага со сериозни природни и културни ресурси, кои сè уште не се доволно искористени. Во услови на неизвесност на меѓународните пазари, домашните дестинации сè повеќе добиваат на значење како безбедна и одржлива алтернатива.
Целосното издание носи анализа на предизвиците, но и можностите за туристичкиот сектор во време на променливи глобални околности.
