Екстра девственото маслиново масло може да има значајни здравствени придобивки и да придонесе за намалување на ризикот од сериозни заболувања, покажуваат повеќе научни истражувања. Според британскиот епидемиолог Тим Спектор, ова масло е една од најкорисните намирници што човек може да ги внесе во секојдневната исхрана.
Во изјава за јавноста, Спектор посочува дека редовната употреба на екстра девствено маслиново масло може да помогне во превенција на срцеви заболувања, мозочен удар, па дури и одредени видови рак. Овие тврдења се поткрепени со повеќе од 30 опсервациски студии, како и со истражување објавено во списанието New England Journal of Medicine, во кое биле следени над 7.000 испитаници во период од шест години.
Резултатите покажале дека лицата кои редовно консумирале маслиново масло имале значително помал ризик од кардиоваскуларни заболувања во споредба со оние кои следеле диета со ниска содржина на масти. Клучната улога ја имаат полифенолите – природни соединенија со силно противвоспалително дејство, кои го подобруваат здравјето на цревата и имунолошкиот систем.
Експертите советуваат маслиновото масло да се користи како замена за путер во секојдневната исхрана, како при готвење, така и при сервирање на храна. Сепак, и покрај бројните придобивки, се препорачува умерена консумација, бидејќи станува збор за висококалоричен производ.
