Цената на нафтата се намали за 5% во вторникот, откако Израел и Иран објавија прекин на огнот. Тоа веднаш се одрази на меѓународниот пазар.
„Брент“ нафтата, светскиот репер за цени на нафта, падна под 67 долари за барел до крајот на денот. Подоцна се стабилизира, но остана под нивото пред конфликтот.
Претходно, цените пораснаа поради стравувања дека Иран ќе ја блокира Ормускиот Теснец. Оваа важна рута за транспорт на нафта и гас е клучна за глобалните резерви.
Берзите во САД, Велика Британија и Европа реагираа позитивно. Тие останаа стабилни по објавата на претседателот Доналд Трамп на социјалните мрежи, каде што го предупреди Израел да не изведува нови воздушни напади.
Неколку часа претходно, Трамп објави дека прекинот на огнот е „веќе во сила“, а Израел потврди дека го прифаќа договорот.
Пад на цените
Цените на нафтата се намали откако претходно достигнаа и до 81 долар по барел, што ги зголеми стравувањата за пораст на трошоците за живот, гориво и бизнис трошоци.
Моментално, суровата нафта се тргува по цена од 67.68 долари за барел – што е пониско од нивото на 13 јуни, кога Израел започна ракетен напад врз иранските нуклеарни постројки.
Аналитичарката Пријанка Сачдева од „Phillip Nova“ изјави:
„Ако прекинот на огнот навистина се почитува, инвеститорите ќе очекуваат стабилизација на пазарот.“
Сепак, таа додаде дека клучно ќе биде дали двете страни ќе се придржуваат до договореното. Падот на цените се намали откако Израел обвини дека Иран повторно прекршил договорот со нов ракетен напад.
Берзите во САД завршија со добивка. Индексите S&P 500, Dow Jones и Nasdaq пораснаа за повеќе од 1%. Во Европа, FTSE 100 во Лондон остана непроменет, а германскиот DAX се зголеми за 1.6%. Јапонскиот Nikkei порасна за 1.1%.
Конфликтот на Блискиот Исток ги зголеми светските цени на енергија. Тоа може да доведе до повисоки сметки за струја и гориво ширум светот, вклучително и во Велика Британија.
На 17% паднаа и големопродажните цени на гасот во Обединетото Кралство во вторникот. Претходно во денот беа високо покачени. Катар е голем извозник на течен природен гас кој поминува преку Ормускиот Теснец.
Во понеделникот, Иран испука ракети врз американска база во Катар, како одмазда за нападите врз иранските нуклеарни објекти.
Растот на енергетските цени потсети на ситуацијата по руската инвазија на Украина. Тој конфликт пред три години ги погоди глобалните економии и секојдневниот живот на милиони луѓе.
