Француската филмска индустрија сè уште е зависна од сцените на пушење цигари, а новата студија покажа дека овој порок е прикажан во скоро сите француски продукции.
Пушењето во просек добивало 2,6 минути по филм, според Француската лига против рак, додавајќи дека тутунот останува сеприсутен во француските продукции.
Здружението објаснува дека ова го гламурира пушењето и повикува на мерки за намалување на неговото присуство во филмот.
Скоро половина век откако Жан Моро и Брижит Бардо заводливо запалија цигари за време на францускиот Нов бран, околу 90 проценти од 150 филмови меѓу 2015 и 2019 година анализирани од здружението имале сцени поврзани со пушење.
Овие вклучуваат директно пушење, присуство на пепелник и цигари, или лик кој зборува за пушење.
Во придружната анкета, две третини од младите Французи рекоа дека ваквите сцени ги намамуваат да запалат цигара.
Практиката на пушење во последниве години опаѓа во Франција, но неговото прикажување во националните филмови е сè уште истакнато, истакна Јама Димирова од Лигата.
–Иако имаме одлични програми за превенција, тутунот сè уште е широко прикажан во филмовите и знаеме дека прикажувањето пушење придонесува за негово нормализирање, изјави Димирова за Би-Би-Си.
Според нејзиното мислење, француските власти мораат на некој начин да го регулираат прикажувањето пушење во филмовите.
Сепак, ваквата иницијатива не им се допаѓа на француските режисери.
–Филмовите не треба да служат како примери. Тие се тука за да покажат што прави општеството, вели наградениот режисер Матју Кашовиќ.
