Климатските промени на многу начини влијаат врз животот на Земјата, а научниците открија дека е забавена и ротацијата на нашата планета со „брзина без преседан“. Тоа значи дека деновите постепено стануваат подолги.
Претходните истражувања покажаа дека топењето на поларните ледени покривки и планинските глечери го зголемува нивото на морето и ја забавува ротацијата на Земјата, бидејќи стопената вода се распределува од половите кон екваторот. Она што досега не било јасно е дали во минатото постоеле периоди кога климата го зголемувала траењето на денот со слично брзо темпо.
Научници од Универзитетот во Виена и ETH Цирих успеале да ги реконструираат промените во должината на денот користејќи фосилни остатоци од едноклеточни морски организми. Хемискиот состав на овие фосили открива промени во нивото на морето, што им овозможува на истражувачите да пресметаат како се менувала должината на денот низ историјата.
Истражувањата покажуваат дека во периодот од 2000 до 2020 година деновите се продолжиле за 1,33 милисекунди по век поради климатски фактори. Новата студија укажува дека вакво брзо продолжување не е забележано во последните 3,6 милиони години, што значи дека сегашните промени главно се должат на човечко влијание.
Зошто подолгите денови се важни?
Иако промените се мерат во милисекунди и луѓето нема директно да ги почувствуваат, тие можат да создадат проблеми во светот кој зависи од прецизно мерење на времето. Системи како GPS и вселенска навигација се потпираат на атомско време, па дури и мали отстапувања можат да предизвикаат технички предизвици.
Сепак, малку е веројатно дека овие промени ќе влијаат врз човечката биологија, како што се спиењето или циркадниот ритам. Ако глобалното затоплување продолжи, научниците предвидуваат дека до крајот на овој век денот може да се продолжи за околу 2,62 милисекунди.
