Заканите на Доналд Трамп за преземање на Гренланд од европските држави веќе не се доживуваат како празна реторика, туку како реална и сериозна можност. Политичкиот врв во Европа, кој донедамна ги игнорираше изјавите на американскиот лидер, сега забрзано бара начин како да реагира, пренесува Politico.
Дипломатски извори од ЕУ оценуваат дека ситуацијата е алармантна и предупредуваат дека Европа мора да биде подготвена и за директна конфронтација со Трамп. Тензиите дополнително се зголемија откако американскиот државен секретар најави разговори со дански претставници за можната американска аквизиција на Гренланд, а од Белата куќа порачаа дека преферираат преговори, но не ја исклучуваат ниту воената опција.
Како одговор, европските дипломатски активности се интензивираа. Францускиот министер за надворешни работи потврди дека со колегите од Германија и Полска разговарал за заеднички европски одговор. Пораката од Брисел е јасна: Гренланд не е на продажба и заканите мора да престанат.
Според анализите, Европа разгледува неколку можни сценарија. Првата опција е компромисно решение преку преговори, со вклучување и на НАТО како посредник, со цел да се намалат безбедносните тензии на Арктикот. Се разгледуваат и зголемени одбранбени инвестиции и почести воени вежби во регионот.
Втората опција предвидува финансиска поддршка за Гренланд. Според плановите на Европската унија, од 2028 година значително би се зголемиле европските средства за островот, со цел подобрување на инфраструктурата и економскиот развој, како алтернатива на американското влијание.
Како трета можност се споменува економски притисок врз САД преку трговски мерки, иако дел од експертите се скептични дека тоа би имало брз ефект. Последната, но и најризична опција, е испраќање европски воени сили на Гренланд по барање на Данска, со цел одвраќање, иако се оценува дека таков чекор носи сериозни безбедносни последици.
Општиот впечаток во европските кругови е дека Унијата се соочува со една од најсериозните геополитички кризи во односите со САД во последните децении.
