Расправиите околу покривката, температурата во спалната соба или навиките за спиење се честа појава во многу врски. Едниот партнер чувствува студ, другиот топлина, а резултатот често е лош сон и зголемена напнатост. Токму затоа сѐ поголемо внимание привлекува таканаречениот скандинавски метод на спиење, кој во последно време стана популарен и на социјалните мрежи.
Методот е едноставен: Партнерите спијат во ист кревет, но секој користи своја покривка или јорган. На тој начин секој може да ја приспособи постелнината според сопствените потреби, без да се наруши блискоста меѓу партнерите. Како што сугерира и името, овој начин на спиење потекнува од скандинавските земји, каде што одамна се практикува.
Иако научните истражувања за спиењето на паровите најчесто се фокусираат на фактори како тишина, темнина и температура, многу експерти сметаат дека индивидуалниот избор на постелнина може да придонесе за поквалитетен сон.
Потребите на луѓето за време на спиењето често се разликуваат. Телесната температура во текот на ноќта зависи од возраста, телесната градба, хормоните и дневниот ритам. Некои претпочитаат лесни и проветрени покривки, додека други се чувствуваат подобро со потешки и потопли.
Разликите често се забележуваат и меѓу жените и мажите. Жените почесто имаат студени раце и нозе и се покриваат повеќе, додека кај некои жени, особено во менопауза, се јавува ноќно потење.
Според поддржувачите на овој метод, користењето одвоени покривки може да ги намали ноќните будења и нарушувањата на сонот, со што се подобрува квалитетот на одморот кај двата партнера.
