Наледи Репаја, во Србија позната како српската снајка од племето Зулу, ги почитува сите православни обичаи, а особено ѝ е важна семејната слава Свети Никола, поради неколку лични и симболични причини.
Таа неодамна објави видео во кое покажа како подготвува славски колач, а воедно сподели и интересна приказна поврзана со овој светец и еден „разговор“ што го памети и денес.
Како што раскажува, Свети Никола е заштитник на морепловците, а токму на брод – крузер – се запознала со својот сопруг Бојан. Оваа случајност за неа има особено значење и дополнително ја зацврстила врската со светецот.
Кога брачната двојка купила куќа стара околу 150 години во селото Мало Црниќе и започнала со реновирање, во една од просториите пронашле свеќа со икона на Свети Никола. Тоа било пресуден момент по кој Наледи почнала подетално да се интересира за православните обичаи и заштитниците на домот.
Таа му предложила на сопругот токму Свети Никола да биде семејната слава во новиот дом, што семејството со радост го прифатило. Денес, славата ја одбележуваат со голема почит и во духот на традицијата.
Наледи се присети и на анегдота од периодот кога го организирале црковното венчавање. При разговор со свештеник по име Никола, таа подоцна му раскажувала на сопругот, но направила симпатичен лапсус:
„Му реков: ‘Ме бараше Свети Никола’, наместо ‘поп Никола’.“
Денес оваа ситуација е само убава спомен-приказна и повод за шега, но и симбол на нејзиниот пат на запознавање и прифаќање на православната традиција.
Во меѓувреме, Наледи не само што ја научила разликата меѓу светец и свештеник, туку и целосно ја прифатила улогата на домаќинка која ги почитува обичаите. Таа самостојно подготвува славски колач, жито и богата трпеза, што може да се види и во видеата кои често стануваат вирални на социјалните мрежи како Instagram.
Семејството Репаја, како што истакнува Наледи, многу држи до традицијата, а славата Свети Никола за нив не е само обичај, туку и симбол на заедништво, благодарност и духовна поврзаност.
Фото извор: Принтскрин YT
