Никој навистина не може да ве подготви за мајчинството. Може да прочитате книги, да слушате совети, да гледате видеа и искуства од други жени – но вистината е дека некои работи се учат дури кога ќе го земете своето дете во раце. Ова се фактите кои посакував некој да ми ги кажеше порано.
Уморот станува секојдневие
Уморот повеќе не е привремена состојба – тој станува начин на живеење. И дури и кога сте исцрпени до крај, во вас постои чувство дека никогаш нема да се предадете. Затоа што за првпат во животот, вашата борба има длабока смисла.
Моите потреби може да почекаат
Ќе научите да јадете ладен оброк, да се туширате набрзина и да ги одложувате сопствените желби без жалење. Не затоа што не се важни, туку затоа што некој друг има поголема потреба од вас – и тоа станува сосема природно.
Трудот не секогаш се препознава
Мајчинството е една од најголемите обврски и најтешките „работи“, но ретко е препознаено и вреднувано. Ќе сфатите дека многу од вашиот труд ќе остане невидлив. И ќе научите да живеете со тоа – затоа што знаете колку давате, дури и кога другите не го гледаат.
Го правам тоа без очекувања
Мајчинството не е инвестиција со поврат. Го правите сето тоа поради битието кое ве направи мајка, а не поради нешто што еден ден треба да го добиете за возврат. Љубовта не бара сметка, ниту гаранции.
Мајчинската љубов е безусловна
Со текот на времето учиме да ги препознаваме и разликуваме видовите љубов. И тогаш сфаќаме дека мајчинската љубов е најблиску до божјата – тивка, трпелива и безусловна. Љубов која не поставува услови и не бара ништо за себе.
Мајчинството не доаѓа со упатство за употреба, но доаѓа со лекции кои засекогаш нѐ менуваат. И токму во тие тивки, напорни и исполнети моменти, сфаќаме колку сме пораснале – заедно со нашите деца.
Магдалена Стојмановиќ – Константинов
