Градоначалникот на Општина Сопиште, Јане Мицевски, преку објава на социјалните мрежи информираше за организирање на уште еден предновогодишен настан од хуманитарен карактер, кој ќе се одржи во паркот пред општинската зграда.
Настанот ќе се реализира под мотото „Пакетче за секое дете“, а неговата главна цел е да се донесе празнична радост за најмладите жители на општината. Како што е најавено, Дедо Мраз ќе дели новогодишни пакетчиња и ќе создаде празнична атмосфера за децата и нивните семејства. Хуманитарната манифестација ќе се одржи на 26 декември (петок), со почеток во 16:00 часот.
Во рамки на настанот ќе бидат поставени и кутии за донации, наменети за помош на сограѓанинот Давид, со што настанот добива и силна солидарна димензија. Организаторите упатуваат апел до граѓаните, согласно можностите, да се вклучат и да дадат свој придонес.
Празничната програма ќе биде збогатена со музички настапи на Пајак и Лара, кои ќе се погрижат за добра забава и весела атмосфера.
Од Општина Сопиште порачуваат дека ваквите настани се потсетник дека хуманоста, солидарноста и заедништвото се вредности кои ја обединуваат заедницата, особено во пресрет на новогодишните празници.
