Еврокомесарот за проширување Оливер Вархеи, попладнево ги презентира извештаите за земјите од Западен Балкан и Турција пред Европскиот парламент. Вархеи за Македонија изјави дека 2022 беше важна година со отпочнувањето на преговарачкиот процес.
– Северна Македонија го отпочна преговарачкиот процес со првата политичка меѓувладина конференција што одамна требаше да се случи, ова е пробив за земјата. Македонија покажа одлучност и издржан напредок – изјави Вархеи пред европратениците.
Еврокомесарот забележа дека е важно земјата да го задржи реформското темпо и да го искористи процесот на скрининг, за да го искористи својот потенција за забрзување на реформите.
Според него, потребни се дополнителни напори во областа на јавната администрација.
Извештајот го поздравува целосното усогласување на Македонија со надворешната политика на ЕУ, посебно во однос на Украина.
– Со ова земјата ја покажа својата одлучност да напредува на својот ЕУ пат – изјави Вархеи.
По Европскиот парламент еврокомесарот треба да се обрати и пред новинарите по објавувањето на годишните реформски извештаи за шесте земји од Западен Балкан и Турција.
