Протестите за смртта на 25-годишниот маж застрелан од полицијата продолжуваат во Албанија веќе петти ден по ред. Младиот човек бил застрелан од полицаец за време на потера за време на полицискиот час воведен како дел од мерките преземени за контрола на коронавирусот, пренесува Anadolu Agency (AA).
Демонстрантите најпрво се собраа на плоштадот Скендербег во Тирана, каде се судрија со полициските сили по повикот да се растераат поради забрана за масовни собири, како дел од мерките против пандемијата КОВИД-19.
Стотици демонстранти потоа маршираа по Булеварот на народни херои, извикувајќи „Правда за Клавдиј“ и „Нема мир без правда“, а за време на минувањето покрај седиштето на премиерот на Албанија беа забележани инциденти со оштетување на билборди и патокази.
По оставката на министерот за внатрешни работи Сандер Лелешај, демонстрантите бараат оставка од генералниот директор на албанската полиција Арди Велиу, како и полициски реформи.
Демонстрантите го продолжија маршот по должината на Булеварот до седиштето на Министерството за внатрешни работи со транспаренти на кои пишуваше „Полиција насекаде, правда никаде“ и „Дури и полициското насилство е пандемија“.
Демонстрантите беа насилни и претходните денови, а полицијата одговори со солзавец. Клодијан Раша (25) бил застрелан од полицаец ноќта на 8 декември за време на потера за време на полицискиот час.
Според полициското соопштение, Раша не застанал на повик на полицијата, туку започнал да бега, а потоа полицаец го застрелал. Окружниот суд во Тирана му одреди мерка „затворски притвор“ на полицаецот Невалд Хајдарај, кого властите го обвинуваат за пукање на едно момче со службено оружје за време на неговата служба во Тирана.
